AZƏRBAYCAN TEXNİKİ UNİVERSİTETİ 2026-cı il üzrə DAXİLİ QRANT MÜSABİQƏSİ

Azərbaycan Texniki Universiteti (AzTU) universitetin tədqiqat universitetinə transformasiya strategiyasının həyata keçirilməsi, elmi-tədqiqat fəaliyyətinin keyfiyyətinin yüksəldilməsi, tədqiqat qruplarının formalaşdırılması, rəqəmsal tədqiqat idarəetməsinin inkişaf etdirilməsi, sənaye ilə əməkdaşlığın genişləndirilməsi və universitetin beynəlxalq elmi görünürlüğünün artırılması məqsədilə 2026-cı il üzrə Daxili Qrant Müsabiqəsini elan edir.

Müsabiqənin əsas məqsədi bilavasitə universitetin ehtiyaclarına yönələn tətbiqi və eksperimental-konstruktor xarakterli elmi tədqiqatların inkişafını təşviq etmək, innovativ və sənaye yönümlü həllərin yaradılmasını dəstəkləmək, tətbiqi nəticələrin və elmi məhsuldarlığın artırılmasına töhfə vermək, gənc tədqiqatçıların elmi potensialını inkişaf etdirmək, eləcə də universitetin strateji inkişaf prioritetlərinə uyğun olaraq beynəlxalq rəqabətqabiliyyətli tədqiqat mühitinin formalaşdırılmasına dəstək göstərməkdir.

Müsabiqə AzTU-nun professor-müəllim heyəti, elmi işçiləri, doktorantları, magistrantları və tələbələri tərəfindən təqdim olunan fundamental, tətbiqi və eksperimental-konstruktor xarakterli elmi-tədqiqat layihələrinin müsabiqə əsasında seçilməsi və maliyyələşdirilməsi üçün nəzərdə tutulmuşdur.

Daxili Qrant Proqramı AzTU – nun fəaliyyətinin və infrastrukturunun problemlərinə uyğun ehtiyaclarının araşdırılması ilə bərabər universitetdə tədqiqat mədəniyyətinin inkişaf etdirilməsini, multidissiplinar tədqiqat qruplarının yaradılmasını, laboratoriya əsaslı araşdırmaların genişləndirilməsini, elmi rəhbərlik və mentorluq institutunun gücləndirilməsini, sənaye ilə birgə tədqiqatların təşviqini, patentləşmə, texnologiya transferi və elmi nəticələrin kommersiyalaşdırılmasını, eləcə də beynəlxalq səviyyədə rəqabətqabiliyyətli elmi məhsulların və yüksək impaktlı nəşrlərin sayının artırılmasını hədəfləyir.

Müsabiqənin əsas məqsədləri

Daxili Qrant Müsabiqəsinin əsas məqsədləri aşağıdakılardır:

• AzTU-nun tədqiqat universitetinə transformasiyasına xidmət edən elmi-tədqiqat və innovasiya fəaliyyətini təşviq etmək;
• Tədqiqat qruplarının və elmi məktəblərin formalaşdırılmasını dəstəkləmək;
• Web of Science və Scopus bazalarında indekslənən nəşrlərin, patentlərin və digər elmi nəticələrin sayını artırmaq;
• Magistrantların, doktorantların və gənc tədqiqatçıların elmi fəaliyyətə cəlb olunmasını təşviq etmək;
• Universitet–sənaye əməkdaşlığını, texnologiya transferini və elmi nəticələrin kommersiyalaşdırılmasını dəstəkləmək;
• Universitetin rəqəmsal transformasiyasına, laboratoriya və tədqiqat infrastrukturunun inkişafına yönəlmiş layihələri təşviq etmək.

Qrant kateqoriyaları və maliyyələşdirmə

Müsabiqə çərçivəsində layihələr aşağıdakı kateqoriyalar üzrə təqdim olunur. 

Layihənin aid olduğu kateqoriya onun məqsədi, gözlənilən nəticələri, komandanın elmi potensialı və tələb olunan maliyyə həcmi nəzərə alınmaqla müəyyən edilir.

Qeyd: Layihələrin maliyyələşdirilməsi ayrılmış ümumi fond, ekspertiza nəticələri və layihənin büdcə əsaslandırmasının keyfiyyəti nəzərə alınmaqla həyata keçirilir.

Prioritet istiqamətlər

Prioritet istiqamətlər AzTU-nun daxili inkişaf ehtiyacları, tədqiqat universiteti hədəfi, mühəndislik sahələrində qlobal texnoloji trendlər və sənaye ilə inteqrasiya imkanları nəzərə alınmaqla müəyyən edilmişdir.

Layihələr aşağıdakı prioritet istiqamətlərdən ən azı birinə uyğun olmalı, fənlərarası yanaşma nümayiş etdirən layihələrə isə üstünlük veriləcəkdir.

Müsabiqədə iştirak şərtləri

Daxili Qrant Müsabiqəsinin keçirilməsi aşağıdakı şərtlər əsasında həyata keçirilir:

• Layihələr AzTU – nun fəaliyyətinin və infrastrukturunun problemlərinə uyğun ehtiyaclarının araşdırılmasına həsr olunmalıdır.
• Müsabiqədə yalnız Azərbaycan Texniki Universitetinin professor-müəllim heyəti, elmi işçiləri, doktorantları, magistrantları və tələbələri, eləcə də birgə tədqiqatların əlaqələndirilməsi üzrə müqavilə tərəfdaşı olan tədqiqat institutlarının əməkdaşları iştirak edə bilərlər.
• AzTU tərəfindən əvvəlki daxili qrant müsabiqələri çərçivəsində maliyyələşdirilmiş, hazırda icra olunan və ya digər maliyyə mənbələri hesabına dəstəklənən eyni məzmunlu layihələr müsabiqəyə qəbul edilmir.
• Layihələr alim və tədqiqatçılardan ibarət müvəqqəti elmi-tədqiqat kollektivləri tərəfindən təqdim edilməlidir.
• Hər layihə üzrə bir layihə rəhbəri müəyyən edilir.
• Layihə komandası layihə rəhbəri daxil olmaqla minimum 3, maksimum 5 nəfərdən ibarət olmalıdır.
• Layihə rəhbəri və icraçılar layihənin mövzusuna uyğun elmi fəaliyyət, tədqiqat təcrübəsi və elmi nəşrlərə malik olmalıdırlar.
• Layihənin icra müddəti 12 aydan artıq olmamalıdır.
• Cari müsabiqədə hər bir şəxs yalnız bir layihədə (layihə rəhbəri və ya icraçı qismində) iştirak edə bilər.
• Layihələr AzTU-nun Daxili Qrant Müsabiqəsinin tələblərinə uyğun hazırlanmalı və müəyyən edilmiş müddətdə təqdim edilməlidir.
• Təqdim olunmuş layihələr texniki və elmi ekspertiza mərhələlərindən keçirilir.
• Beynəlxalq elmi əməkdaşlığın genişləndirilməsi məqsədilə xarici universitet və elmi-tədqiqat müəssisələrinin alimlərinin layihələrə tərəfdaş qismində cəlb edilməsi təşviq olunur.
• Müsabiqənin nəticələrinə əsasən qalib layihələrin rəhbərləri ilə Azərbaycan Texniki Universiteti arasında layihənin icrasına dair müqavilə bağlanılır.

Təqdim olunmalı sənədlər

• Müsabiqədə iştirak etmək üçün aşağıdakı sənədlər təqdim edilməlidir:
• Layihə təklifi (məqsəd, problem, elmi yenilik, metodologiya, iş paketləri, nəticələr və risklər);
• Layihə rəhbəri və icraçıların qısa tərcümeyi-halı (CV) və əsas elmi nəticələrinin siyahısı;
• Büdcə cədvəli və xərclərin əsaslandırılması;
• Layihənin icra qrafiki və mərhələlər üzrə nəticə indikatorları;
• Sənaye müəssisəsi və ya xarici elmi tərəfdaş mövcud olduqda dəstək məktubu və ya niyyət məktubu;
• Layihə nəticələrinin AzTU-nun tədris, tədqiqat, laboratoriya və ya rəqəmsal idarəetməsistemlərinə inteqrasiya planı və s.

Maliyyələşdirilə bilən xərclər

Daxili Qrant Müsabiqəsi çərçivəsində layihələrin icrası üçün aşağıdakı xərc istiqamətləri maliyyələşdirilə bilər.

Qiymətləndirmə meyarları

Layihələr iki mərhələdə qiymətləndirilir:

• Texniki uyğunluğun yoxlanılması;
• Elmi ekspert qiymətləndirilməsi.

Elmi ekspertiza zamanı aşağıdakı meyarlar əsas götürülür:

• Elmi yenilik və aktuallıq;
• Tədqiqatın metodoloji əsaslandırılması;
• Gözlənilən nəticələrin elmi və praktik əhəmiyyəti;
• Prioritet istiqamətlərə uyğunluq;
• Layihə komandasının elmi potensialı;
• Büdcənin əsaslandırılması və səmərəliliyi;
• Nəticələrin tətbiq və kommersiyalaşdırma potensialı;
• Layihənin universitetin strateji inkişaf məqsədlərinə uyğunluğu;
• Beynəlxalq əməkdaşlıq və nəticələrin beynəlxalq görünürlük potensialı.

Qeyd: Qiymətləndirmə nəticələrinə əsasən maliyyələşdiriləcək layihələr müəyyən edilir və        yekun qərar Azərbaycan Texniki Universitetinin müvafiq qərarverici orqanı tərəfindən təsdiq edilir.

Gözlənilən nəticələr və minimum öhdəliklərHər layihə seçilmiş kateqoriyaya uyğun olaraq ölçülə bilən nəticələr təqdim etməlidir. Layihənin nəticələri müqavilədə müəyyən edilmiş fəaliyyət planına və göstəricilərə uyğun qiymətləndirilir.

Müsabiqənin keçirilmə qrafiki

Daxili Qrant Müsabiqəsi aşağıdakı qrafikə uyğun olaraq keçirilir:

Müraciət qaydası

Müsabiqədə iştirak etmək istəyən iddiaçılar layihə sənədlərini müəyyən edilmiş forma və tələblərə uyğun hazırlayaraq https://e-grant.aztu.edu.az/ elektron sistemi vasitəsilə təqdim etməlidirlər.

Elektron sistemə yüklənmiş layihə sənədlərinin imzalanmış çap nüsxələri müsabiqə elanında göstərilən son tarixədək Azərbaycan Texniki Universitetinə təqdim edilməlidir.

Müəyyən olunmuş müddətdən sonra təqdim edilən, natamam sənədlərlə müşayiət olunan və ya müsabiqə şərtlərinə cavab verməyən layihələr qiymətləndirilməyə qəbul edilməyəcəkdir. 

Əlaqə

Əlavə məlumat almaq üçün aşağıdakı əlaqə vasitələrindən istifadə edə bilərsiniz:

Azərbaycan Texniki Universiteti

Tədqiqat, İnkişaf və Reputasiya Departamenti

Ünvan: H. Cavid prospekti 25, Bakı AZ1073, Azərbaycan

Telefon: (+994 12) 538 33 83

E-poçt: grant@aztu.edu.az

Veb-sayt: www.aztu.edu.az