AzTU "Yaşıl Kampus" Konsepsiyası Çərçivəsində Hibrid Günəş Stansiyası, Enerji Saxlama və Elektromobil Şarj İnfrastrukturunun Layihələndirilməsi Və İntellektual İdarəetmə Sisteminin Əsaslandırılması

​Bu layihə Azərbaycan Texniki Universitetinin (AzTU) "Yaşıl Kampus" strategiyası çərçivəsində bərpa olunan enerji mənbələrinin (BOEM), batareya enerji saxlama texnologiyalarının və elektromobillik altyapısının vahid Ağıllı Mikroşəbəkə (Smart Microgrid) mühitində layihələndirilməsini, daxili şəbəkəyə təsirinin analizini və intellektual idarə olunmasını əhatə edir. Günümüzdə nəqliyyat sektorunun elektrifikasiyası və elektrik nəqliyyat vasitələrinin (EV) kütləvi tətbiqi müəssisələrin daxili 10/0,4 kV-luq elektrik şəbəkələrində anı güc sıçrayışlarına, gərginlik tərəddüdlərinə və transformator yarımstansiyalarında aşırı yüklənmələrə səbəb olur. Təklif olunan mühəndislik həlli 25,2 kWp gücündə Günəş Elektrik Stansiyası (GES), 25-26 kWh tutumlu LiFePO4 Batareya Enerji Saxlama Sistemi (BESS) və 2 x 11 kW (ümumi 22 kW) hibrid EV şarj stansiyasını daxili paylayıcı şəbəkəyə inteqrasiya edərək mərkəzsizləşdirilmiş və etibarlı enerji infrastrukturu formalaşdırır. ​Layihə çərçivəsində tətbiq edilən hibrid inverter və avtomatlaşdırılmış BMS (Battery Management System) arxitekturası günüz vaxtı GES tərəfindən hasil edilən artıq enerjinin BESS-də toplanmasını və şarj tələbatı yarandıqda istifadə olunmasını tənzimləyir. "Peak Shaving" (pik yüklərin hamarlanması) texnologiyası sayəsində şarj stansiyalarının eyni vaxtda mərkəzi şəbəkədən çəkdiyi kəskin yük sıçrayışları məhdudlaşdırılır, daxili şəbəkənin gərginlik sabitliyi qorunur və enerji itkiləri minimuma endirilir. Mərkəzi şəbəkədə baş verən qəza və ya planlı kəsintilər zamanı hibrid inverter avtomatik olaraq müstəqil (Off-Grid) rejimə keçərək BESS və GES hesabına ən azı 1 saat müddətində tam güclə kəsintisiz şarj prosesini təmin edir. ​Ekoloji baxımdan layihə coğrafi insolyasiya göstəricilərinə əsasən il ərzində ortalama 32 000 – 35 000 kWh təmiz elektrik enerjisi hasil etməklə atmosferə atılan 16-18 ton CO₂ ekvivalentində istixana qazının qarşısını alır. Akademik müstəvidə isə sistem yalnız enerji təminatı ilə məhdudlaşmır; quraşdırılmış Ağıllı Sayğaclar (Smart Meters) vasitəsilə bərpa olunan enerji hasilatını, batareya rejimlərini və şarj göstəricilərini real vaxt rejimində mərkəzi serverə ötürərək AzTU-da "Living Lab" (Canlı Laboratoriya) mühitini yaradır. Bu baza bərpa olunan enerji, Mikroşəbəkə idarəetməsi və güc elektronikası ixtisasları üzrə təhsil alan bakalavr və magistrantlar üçün əvəzsiz tədqiqat və təlim poliqonu rolu oynayır.