BİTKI MƏNŞƏLİ XAMMAL ƏSASINDA FUNKSİONAL MƏHSULLARIN İŞLƏNIB HAZIRLANMASI VƏ TƏDRİS-TƏDQİQAT LABORATORİYASININ YARADILMASI.

Bu layihə Azərbaycanın yerli flora resursları olan yabanı meyvə xammallarının (yabanı üzüm, yemişan, əzgil, yabanı xurma və digər) bioaktiv və texnoloji potensialının kompleks şəkildə öyrənilməsini, onların əsasında yüksək bioloji dəyərə malik funksional içki formulalarının işlənməsini və universitetdə davamlı Tədris-Tədqiqat Laboratoriyasının qurulmasını nəzərdə tutur. 12 ay müddətində icra olunacaq layihə çərçivəsində “xammal → emal → bioaktiv komponent → funksional məhsul” metodoloji zənciri əsasında xammalların fiziki-kimyəvi (pH, nəmlik, quru maddə, özlülük), bioaktiv (polifenollar, flavonoidlər, antosianinlər, antioksidant aktivlik) göstəriciləri təyin ediləcək, ekstraksiya, termiki emal və qurutma parametrləri optimallaşdırılacaqdır. Üzüm şirəsi əsas maye matrisi kimi istifadə olunaraq digər xammallarla zənginləşdirilmiş optimal içki resepturası formalaşdırılacaq və onun saxlanma müddətindəki stabilliyi izləniləcəkdir. Layihə vəsaiti hesabına laboratoriya cihaz, reaktivlər və şüşə qablarla təmin ediləcək, kənar instrumental analizlər reallaşdırılacaq, 1 beynəlxalq Scopus/Web of Science indeksli məqalə dərc olunacaq və Qida mühəndisliyi ixtisası üzrə təhsil alan tələbələrin praktiki-tədqiqat bacarıqları yüksəldiləcəkdir. Layihə həm elmi-tətbiqi nəticələri, həm də yaratdığı infrastruktur ilə universitetin uzunmüddətli elmi-tədqiqat potensialına xidmət edəcəkdir.