Süni intellektin tətbiqi ilə distant tədris üzrə metod və alqoritmlərin yaradılması

Müasir ali təhsil sistemində rəqəmsal transformasiya proseslərinin sürətlənməsi, təhsilalanların fərdi ehtiyaclarının və öyrənmə davranışlarının nəzərə alınması, tədrisin keyfiyyətinin yüksəldilməsi və idarəetmə proseslərinin optimallaşdırılması süni intellekt texnologiyalarının universitet platformalarına inteqrasiyasını zəruri edir. Mövcud rəqəmsal təhsil platformalarının əksəriyyəti əsasən elektron resursların təqdim edilməsi, kommunikasiya və tədris prosesinin idarə olunması funksiyalarını yerinə yetirsə də, tələbələrin fərdi öyrənmə xüsusiyyətlərinin intellektual təhlili, akademik nəticələrin proqnozlaşdırılması, adaptiv tədris və real vaxt rejimində qərar dəstəyi imkanları məhduddur. Təklif olunan layihənin əsas məqsədi süni intellekt, maşın öyrənməsi, data mining, böyük verilənlər və təhsil analitikası texnologiyaları əsasında intellektual, adaptiv və fərdiləşdirilmiş rəqəmsal universitet platformasının konseptual və texnoloji modelinin işlənib hazırlanmasıdır. Platforma universitetin tədris, elmi-tədqiqat, inzibati və tələbə xidmətləri proseslərini vahid rəqəmsal ekosistemdə birləşdirməyə və mövcud məlumatlardan səmərəli istifadə etməklə qərar qəbuletməni dəstəkləməyə yönəldiləcəkdir.